Tunnu’ Zogam

Zogam ah i omna pen Zogam i it luat man ahih khit loh mahbang in Zogam ah i omlohna zong i itloh man hi pah khin tuanlo hi. Zogam a it luat man in Zogam ah om in mun dang, khua dang, gam dang pai khia vetlo cih pen tuhun ah hong hi thei denlo tawh kibang a, tua mahbang in gamdang, mun dang ah pai in Zogam pen i phawk nawn kei a, i it nawn kei a, i lungngaih, i lung beek a len kei leh bel bang hiam khat nak khialh mahmah cihna zong hi thei a, kizopna om vetlo pen itna leh ngaihna kiamta or omlo zong hi thei hi.

Nupa khat, pata khat, unau khat a inn ah a om khop sung un aki tawngtawng phial uh zong in, mun gamla, khualam, gam dang ah a om ciang khat leh khat ki phawk, ki-it, kingai in, ki munuam mahmah hi. Zogam zong i om sung teng in itna ding i theih kei phial zong in, a gamla, mun gamla i tun ciang Tunnu Zogam ki phawk in, ki it hi. Ahi ding mah ahi hi. Tua pen itna nei ihihna, khualna nei ihihna kilang hi.

Nupa khat, unau, pata khual a zin ciang in a khual zin pen nu/ pa inn hong tun kik ding a ngaklahlo, hong tung nei kei leh hoih zaw in teh, sawt pi khual zin khia hen aci a om leh tua innkuan sung kizopna pen akisam khat (itna) om lianlo hi kha ding a, a cidam innkuan hilo cihna ahi hi.

I pianna leh i lamphumna Tunnu Zogam tawh ki gamla in i om ciang in zong i phawk ding, i khual ngetngut ding ahi hi. I phawk nawn kei a, i khual nawn kei a, i simmawh bawl leh bel i nunglamte itna leh khualna nei nawnlo cihna hi a lampial khin kihi ta hi.

Gentehna:
Zogam ah University sang kician om lo hi. Tua ahih man in pilna, siamna i sin theih nading, Zomi leh Zogam i laptoh zawh nading in pilna pen khua pua, gam pua lam ah i sin kul hi. Tua mahmah zong pen Zogam i it loh man hilo in, Zomi leh Zogam tawi sang nuamlua ihih man in, pilna leh siamna a sin ihi zaw hi. Tomgen leng: Zogam tawh a ki gamlatna ah i paina pen Zogam leh Zomi vang pia nuam ihih man hi zaw hi (a tam zaw ah).

Nasep, silbawl, sumzong, paai zongna tuamtuam te hang in Tunnu’ Zogam pan a gamlatna mun leu mual, khua leh tui, tuipi gal khat kaai in ki pai khia ciat hi. I ki gamlat hang in i phawk gigena, i it na leh i lungzuan khua ngaihna pen ITNA I NEIHNA ahi a, a thupi leh a kisam, a hoih mahmah thu khat ahi hi.

Khualzing, gamvak in a pai khia tapa khat a nu teek in inn pan ni ana ngak a, a tapa hon tunkik kal ding, hong na ngaklah mahmah tawh kibang hi.

Aap lipliap, kum tampi pha in, nutek in, nuntak haksat keugaw gam pan i i Tunnu Zogam ka tate bang hun ciang hong ciah kik ding uh hiam? Hong ciah ciang un kei mahmah hong puah nading un sum leh paai, pilna leh siamna, itna leh kikhualna, thu manpha tampi bang zah, kua teng in hong puak ding uh hiam ci in khuadak in, kong biang pan in hong ngak gige den hi…

Tua ahih man in i it mahmah i Tunnu Zogam tawh kimu ding in i ciah zawh pak naikei leh zong laikhak in, sum khak in, puah in, zem ding hangh a, nikten, puansilh leisak in, khedap, tuithawl te guan in, khuavak a muh theih nading in mit limlangte leisak in puan in zuun ding hi hangh…

I tunnu’ Zogam a puah, a zuun ding in nang leh kei mah hong ngak hi. I pilna, i siamna, i thehina, i neihna khempeuh siit lo in, i gam i lei puah in zuun ding pen i Tunnu’ lungtup ahi hi..

Leave a Reply