Numei Innluah za leh Pawlpi Upa

Numei innluah za leh pawlpi upa sep vai kikupna


Pawlpi sung ah Numeite Upa sem sak cih leh Numeite innluah vai pen thu kibanglo (role) kibanglo vaipi nih ahih manin “Yes or No” cih sang in kikup a kul leh, a thu dan khat tawm khat mah suut kul leh kilawm kasa hi.

1. Innluah za cih pen sep a kullo, bawl a kullo a ngah thu hi (a kipiak nak leh)
-Hih pen ngeina, innkuan beh leh phung zat zia tung ah kingah ding hi.
-Tua ban ah innkuan, unau sung ah pasal a om kei leh numei in inn a luah ding pen kuamah kim in sang thei, sang siam in ka lamen hi.
-Pasal unau pih om in, numei innluah za pia cih bang ahih leh a thutuam hi ding a, numei pen a u pen maw ahih kei leh a pasal pen i dinmun cih bang “case to case” tung ah zong kingah in lamen ingh. I ngeina ahih leh bel Pasal te innluah hi a, u pen te in innluah hi. Ahi zong in tuhun ah i ngeina dan in ki kalsuan khin theilo leh, thu leh la tuamtuam hang tawh zat dan, zat zia pen a hunzui in i kalsuan ding akisapna zong om thei hi.
2. Decon/ Pawlpi upa cih pen sep a kul hi a, ngaihsut a kul hi in, thatang mah zong gim kul, tawl kul thei hi.
-Decon icih pen “usher” or “Welcome team” or “palai dan” a sem dingte, service a piading te ahi uh hi. Tua ahih amn in numei ahi a, pasal ahi a, gay or lesbian ahi zong in biakna sung ah khantohna ding a kalsuan pih theih nak leh, a sep zawh nak leh, a ki piakkhiat zawh ding nak leh khen ding kilawm kasa kei hi. Tuhun diakdiak ciang in human rights om a, numei leh pasal i sep leh bawl ki deidanna pen tawm tektek ta hi. Deacon ah zong numei te kilawmlo cih a mu zong om hi. Tua pen pawlpi thukhun, upna kalsuan zia (dogma, doctrine and teachig of the church) tung ah zong kingah hi.
Bang zahta in i biakna ngeina in i zang zong in Lai Siangtho tawh akituak takpi mah hiam, LST in a gen takpi mah hiam cih et kik ding akisap hun zong om thei hi. I zat ngei zeel ahih man in deacon ding in pasal mah kilawm zaw kisa hi. Senior Pastor ding in zong i muh ngei zeel ahih man in pasal ding mah in kilawm kisa pong hi. Ahi zong in LST in numeite in pastor sem theilo ding, deacon sem theilo ding cih khamna leh dalna om lo in thei ingh.

One thought on “Numei Innluah za leh Pawlpi Upa

  1. Taang Sianpu March 20, 2012 at 3:52 am

    Pawlpi sung ah Deacon vai:
    A min bek sazuk kipuak a pua a, bang mah a sem theilo Deacon pasal sang in, Numei kician sinsen mahmah khat in deacon sem leh a pawlpi daupai zaw ding a, matung zaw ding hi. Tua ahih manin deacon cih pen za zong hi khollo zaw in sepkhiatna "service" lam hi zaw ahih meh in a sem theithei ding mah zong thupi ding hi

Leave a Reply