Pilna maw Hauhna?

Zomi te a ding in thuhun in i ngaihsutna hong liinglawng sak leh hong nawngkaisak thei thukhat in Pilna leh Hauhna cih thu ahi kha ding hi. Pilna leh Hauhna icih sang in Pilna maw Cihtheihna ci leng kilawm zaw a, Pilna maw Cihtheihna icih sang in Pilna leh Cihtheihna ci leng hoih zaw hi.
Pilna nei khat cimawh cih omlo ding a, mi hai khat hau gawp cih zong om thei tuanlo hi. Mi khat in bang cih sum ngah ding, bang cileng a lampi om cih a theihna leh a sepna in Pilna pah a, pilna nei khat i tavai lo in a puksihlohna in cihtheihna ahi hi.
Tua ahih man in Pilna maw Hauhna cih ding hilo a, Pilna leh Cihtheihna cih ding ahi zaw hi. Solomon in Pasian’ kiang ah Pilna a nget ciang in Pilna ban ah Hauhna zong na pia thuah lai hi. Zomite in ikisap pen Hauhna zong ahi venvan pah nai kei a Pilna leh Cihtheihna ahi hi.
Ankhing kham ding ciang leh iki taangsap bang a van zo ding in Pasian in Zomite Pilna leh Cihtheihna hong pia khin lua hi. Imuh nai kei leh, i muh theih naikei leh hanciam lai in, khuadak lai leng Pilna leh Cihtheihna pen Zomi mikim tung ah a om khit ahih lam i phawk thei thei ding hi.
Haksatna leh Simmawhna a pua keeikaai den ding in Pasian in hong geelsak lo a, i vangikte suahkhia in gualzawhna leh cihtheihna lampite tawn in a masuan ding in hong deihnathu i tel theih na ding thupi mahmah hi.
Zomi te cihtheihna leh Pilna hongpia khin Topa’ min iphat hi!
Tg. SianpuKL